TAÇIRMA DO 8, APRENDE A XOGAR

De seguido poñemos a túa disposición a esencia, as normas e a terminoloxía da Taçirma do 8 (T8):

-Que se precisa para xogar á T8?

Un único conxunto composto por un grupo de xogadores (os chamados chalupeiros), armados cada un cunha camisola (a chalupa) e un "manoxo" de chaves (o chavo do oito) para compartir entre todos os chalupeiros. O número de chalupeiros vai de 2 a 8 (facendo referencia ao nome deste magnífico deporte).

-En torno a que xira a T8?

A acción básica do xogo, polo cal se move éste, son os toques ou polyesters (pase do chavo do oito entre dous chalupeiros). Cada chalupeiro pode realizar dous polyesters consecutivos, sen que un compañeiro reciba o chavo (de chavo do oito). A esencia do xogo é realizar o maior número de polyesters sen que o chavo bata no chan; o equipo tratará de superar a súa mellor marca unha e outra vez.

-Con que se pode golpear o chavo?

Evidentemente coa chalupa (camisola), co pé (esto é un denominado frigopié) ou mesmo coa cabeza e a cara (non é o habitual por non ser agradable, xa que o ferro do chavo fai dano).

-Onde se xoga?

Pódese xogar en recinto pechado (o habitual en inverno e outono) ou ao aire libre (o habitual en verán e primavera). Tanto nun, coma no outro, o terreo de xogo denomínase plaqueta. As dimensións son infinitas e abstractas senón o evitan construcións ou obxetos (coma por exemplo unha parede).

-Cando remata o xogo?

O xogo remata cando o chavo cae ao chan, cando un chalupeiro fai un golpeo ilegal (remitirse á pregunta "Con que se pode golpear o chavo?" antes contestada) ou cando o chavo bate nunha construción ou nun obxeto (como por exemplo unha parede ou un coche). No caso de estar xogando en recinto pechado, o chavo pode petar no teito, pero considérase un rehúse e só se poden realizar tres por partida.

-Hai máis persoas que participan na T8 sen ser os chalupeiros?

Pode habelas, pero son totalmente prescindibles. O adestrador é coñecido coma oChé e encárgase dos trocos (Tutti-Frutti). A persoa que se adica a levar a conta dos polyesters é o Coleghiao (que pode ser un chalupeiro que non minta ou unha persoa allea).

-Clasificación segundo o número de polyesters:

5 polyesters: WACAMOLE

10 polyesters: FUUROOORRR

20 polyesters: YERAPA

50 polyesters: CHIHUAHUA

100 polyesters: JÁMIN-JÁMINA-JÁMINA

Exemplo: un conxunto fai dez pases (polyesters), pois entón realizou un "fuurooorrr".

-O resto de terminoloxía:

ZAS: xogando en recinto pechado, cando o chavo bate no teito. Aos tres ZAS unha mesma partida queda anulada a conta de polyesters. Un ZAS conleva a un rehúse.

CRASH: cando o chavo cae ao chan, rematando de forma automática coa partida. Esto é un neoloxismo arcaico (mira ti que paradoxa), é dicir, está en desuso.

TXAKARITA: erro, ben sexa unha xogada ilegal ou cando cae o chavo.

TORERO: xogador que realiza unha txakarita.

BATASUNA: xogada ilegalizada (coma por exemplo golpear de forma voluntaria coa man).

MASCAREÑAS: xesto de gran beleza. Consiste en calquera tipo de amago ou simplemente nun polyester legal que non sexa habitual.

LELO: cando un polyester dispárase moi lonxe de forma involuntaria, pero por acción dun chalupeiro.

FLUÍR: verbo empregado para describir o voo do chavo.

PALEAR: verbo que se utiliza para falar do acto de golpear o chavo coa chalupa.

TRACTOR DE 20 RULOS (Td20R): xogador que máis polyesters realiza durante a partida.

O ESPAÑOL: xogador que menos polyesters realiza durante a partida.

MANDULÁ: denominación similar a partida, "botar unha mandulá" é o mesmo que "botar unha partida".

ARRANCADEIRA: realízase coa man, é o denominado saque. Un chalupeiro lanza o chavo a un compañeiro para comezar o xogo.

TAÇIRMA DO 8 TOUR 2010

A Selección Galega representará a nosa Terra o 28 de xuño en Bilbo, diante do mesmísimo Guggenheim. Podes animar aos teus ídolos, viaxando en bus por tan só 80€ (bus + entrada á función incluída). Ponte en contacto: liganacionalt8@hotmail.com

TENDA DA LNT8

Merca os produtos oficiais da Liga Nacional de Taçirma do 8:

CHAVO DO 8

Referencia: #Chavo oficial#. Prezo: 3€

Elemento fundamental na práctica da T8. Merca unha réplica feita a man do chavo co que xogan os teus ídolos. Composto de tres chaves que xa non abren ningunha porta e un aro cuxo peso é o axeitado.

CHALUPA

Referencia: #Chalupa de Competición#. Prezo: 5€

Chalupa coa que os integrantes da Seleción Galega participan en competicións oficiais. Composta duns materias textís pensados para a competición de máis alto nivel da T8. Mesmo a podes pedir autografiada sen ningún custo adicional.

PACK DE INICIACIÓN

Referencia: #Pack Amigos#. Prezo: 17€

Catro chalupas oficiais máis un chavo regulamentario. Este pack está deseñado para que un grupo de catro amigos se inicie no deporte da Taçirma do 8. O prezo é mínimo, para potenciar o xogo por todo o mundo, unha das filosofías da LNT8.

Nos prezos non se inclúe os gastos de envío. O pago será mediante reembolso. Para mercar algún dos productos ponte en contacto con: liganacionalt8@hotmail.com

NOTA: os produtos adáptanse ás fotografías.

As superestrelas da T8

Non cabe dúbida, a Selección Galega é o mellor conxunto do mundo e por tanto, os galegos, os mellores chalupeiros do planeta.

Agora faremos un repaso aos cracks do país:

Alessandro Pita, PITA

-Altura: 1,79 m -Peso: 73 Kg -Tipo de chalupa habitual: Intermedia

O de Narón comezou coa práctica da T8 mentres cursaba segundo de bacharelato nun instituto onde se despreciaba aos alumnos que non pertencían á cidade de Compostela. Isto terá moita repercusión no seu xogo, xa que toda a rabia acumulada durante horas de clase, queda plasmada na chalupa e no chavo nos encontros.

Chückynho Raña, CHÜCKY

-Altura: 1,69 m -Peso: 66 Kg -Tipo de chalupa habitual: Intermedia

Socio-fundador da Liga Nacional de Taçirma do 8, sempre está a darlle voltas a este estupendo deporte. Un estudoso da complexa táctica da T8, mostra gran electricidade durante os xogos. Nunca da un chavo por perdido e iso permítelle recuperar polyesteres que xa fican fóra.

Xoan Manuel Sánchez, XANMA

-Altura: 1,68 m -Peso: 61 Kg - Tipo de chalupa habitual: Axustada

Entra na élite da T8 despois dun duro traballo para mellorar a súa capacidade paladora. O seu nefasto xogo de frigopié e a súa pouca velocidade, é contrarrestada por desprazamentos moi intelixentes e por golpes de chalupa moi altos, permitíndolle aos seus compañeiros unha reorganización rápida sobre a plaqueta.

Perico Kdongo, PERI

-Altura: 1,77 m -Peso: 63 Kg -Tipo de chalupa habitual: Amplia

Escollido en 2010 como MCA (Mellor Chalupeiro Afrogalaico), mostra sempre grande regularidade durante toda a tempada, e por isto, non soe ser nin o "Tractor de 20 Rulos" nin o "Español" dos encontros. Actualmente compaxina a súa labor de xogador profesional, con traballos de promoción da LNT8.

Rubén Veiga, BEJIA

-Altura: 1,79 m -Peso: 76 Kg -Tipo de chalupa habitual: Axustada

Ao contrario que os outros catro chalupeiros anteriores, non comezou a xogar á T8 dende a creación da mesma. A pesar disto, está totalmente adaptado dentro da Selección Galega despois dun proceso de ensinanza da filosofía do divino deporte. Abandonou deportes de segunda (coma o fútbol), para centrarse na T8 (mostra de fidelidade que agradeceu todo o mundiño do chavo).

Que é a T8?

A T8 son as siglas de "Taçirma do 8", e agora ben, cales son as bases da Taçirma do 8?

Segundo os Estatutos da Liga Nacional de Taçirma do 8 (creados en Compostela no maio de 2010), os trazos fundamentais deste excepcional deporte son:

1-A filosofía da T8 é, ante todo, a de pasalo ben. Por iso é un xogo concebido para que non perda ninguén.

2-A T8 é un xogo de equipo, no que o conxunto trata de bater a súa mellor marca, unha e outra vez.

3-A T8 ten unha ideoloxía ligada ao progreso, por iso é o único deporte do mundo no que non hai perdedores (remitíndonos ao artigo 1), e todos os participantes rematan os encontros cun sorriso de orella a orella.